Bekende argitek, Gilbert Colyn wat ook die Konservatorium vir Musiek aan die Universiteit van Stellenbosch ontwerp het, (hierdie gebou word steeds beskou as een van die beste konserwatoriums ter wêreld) het die erg verwaarloosde geboue van Klein Boschkloof met 'n sensitiewe aanslag en kundigheid omskep tot drie prag-chalets:

Die perdestal, skuur en die ou plaashuis (volgens oorlewering sowat 250 jaar oud!) is geleë tussen die lemoenboorde en het 'n lieflike uitsig oor die majestieuse berge. By Klein Boschkloof kan die stilte en vreedsaamheid letterlik gevoel word.

Met die dorp en al sy moderne geriewe binne maklike bereik, is Klein Boschkloof die ideale basis vanwaar die Cederberge, Lambertsbaai, Elandsbaai, die sendingstasie te Wupperthal, Namakwaland en vele ander klein dorpies aan die N7 Nasionale Pad, ontdek en beleef kan word.

Klein Boschkloof is die ideale bestemming vir 'n vreedsame naweek weg van die stadsgewoel, 'n familiebyeenkoms, 'n intieme troue of verjaarsdagpartytjie vir diegene wat bloot net van alles wil wegkom! Gedurende die lente (vanaf Augustus tot Oktober) skud die omgewing wat Klein Boschkloof knus omring, sy dorre baadjie in 'n japtrap af en ontpop in 'n malse bont kleurspel van veldblomme wat duisende toeriste lok.

Plekke wat werklik die moeite werd is om 'n besoek te regverdig wanneer u by Klein Boschkloof kom kuier, sluit onder meer in: Die bekende San rotstekeninge, Die rooibosteeplase, die legendariese Strassberger skoenfabriek, die nabygeleë Voëleiland, die wêreldbekende rotsformasies van die Cederberge en 'n verskeidenheid ander plekke wat besienswaardig is.

Vir die meer energieke besoeker bied Clanwilliam 'n jaarlikse driekamp aan in Oktober, staproetes, swem, fietsry, bergklim, "bouldering", perdry, watersport en hengel by die Clanwilliam Dam.

Jy kan natuurlik ook die gebied besigtig vanuit een van die vliegtuie van The Red T Company! Clanwilliam spog met 'n baie matige winterklimaat en borrelende sjampanje-aande vanaf Mei tot Oktober! Ongelukkig word geen troeteldiere toegelaat by Klein Boschkloof nie en bied ons geen kredietkaartgeriewe aan nie.

Daar is egter veilge parkering beskikbaar en 'n heerlike swembad in die kompleks. 'n Kontinentale ontbyt is ook beskikbaar op versoek (Onthou om ons betyds te laat weet!) Op die plaas word hout en tuisgemaakte konfyt en konserf te koop aangebied. Klein Boschkloof is geleë in 'n malaria-vrye gebied.

ONTHOU:

Die verskil tussen "gewoon" en "buitengewoon" is daardie spesiale bietjie ekstra . . . en DIT is presies wat Klein Boschkloof bied!